လက်တွေ့တစ်ချို့ရွက်လွှင့်ကြည့်ခြင်း

*ညဉ့်နက်နက်သန်းခေါင်ယံမှာ

တိတ်ဆိတ်ခြင်းတွေ ကြီးစိုးမင်းမူလာတဲ့အခါ

စိတ်ကူးတစ်ချို့ ရွက်လွှင့်ရင်း

အတွေးစတစ်ချို့ လမ်းလျှောက်ထွက်ကြည့်တယ် …။

*တစ်ယောက်နဲ့တစ်ယောက် တိုက်ကြခိုက်ကြနဲ့

မနာလိုရန်စောင်မှုတွေကိုလည်း

အံ့သြစွာမြင်ရတယ် …။

*ငိုကြွေးပူဆွေးခြင်းတွေနဲ့ ကိုယ့်အနားက

ရှင်ကွဲနဲ့သေကွဲ ခွဲခွာသွားကြတဲ့သူတွေအတွက်

ပူဆွေးဝမ်းနည်းနေခြင်းတွေကိုလည်း တွေ့ရတယ် …။

*တွန်းကြတိုက်ကြနဲ့ ကိုယ်နေရာရဖို့

အသိအမှတ်ပြုခံရဖို့အတွက်လည်း

တစ်ဦးအပေါ်တစ်ဦး ဖိနှိပ်မှုတွေကို ကြုံရတယ် …။

*ဟစ်ကြွေးအော်ခေါ်နိုင်ခြင်းကင်းစွာနဲ့

ကူကယ်ရာမဲ့ သနားစဖွယ်အတိနဲ့

သက်ကြီးသက်ငယ်တွေကိုလည်း တွေ့ရပြန်တယ် …။

*လူတစ်ယောက်ရဲ့ အမှတ်တမဲ့စကားတစ်ခွန်းကြောင့်ပဲ

လူအများကပြစ်တင်ကဲ့ရဲ့ ရှုံ့ချမှုတွေကိုလည်း

မထင်မှတ်လောက်အောင် မြင်ရပြန်တယ် …။

*လောဘ၊ မောဟ၊ ဒေါသတွေအတွက်နဲ့

အသက်တွေ ဘဝတွေစတေးခံနေကြရတာကိုလည်း

ကြောက်ခမန်းလိလိ တွေ့လိုက်ရပြန်တယ် …။

*"လောက လောက"လို့ တွေးပြီး

"အော် လူတွေ လူတွေ"လို့ပဲ တီးတိုးရေရွတ်ရင်း

အတွေးတွေနိဂုံးချုပ် မီးခလုတ်ကိုပိတ်ရင်း

နှစ်ခြိုက်စွာအိပ်ပစ်လိုက်တာပဲ ကောင်းပါတယ်လေ!!!

မိုးညချမ်း

21.2.2013(12:50 p.m)